دویم فصل: د نېکمرغۍ هسک مقامونه

 لیکوال: محمدناصر حلیمي

د نېکمرغۍ هسک مقامونه

قرآن له ښېګڼو، برکتونو او ارزښتمنو لارښوونو ډک کتاب دی، لوستل، عملي کول او نورو ته رسول یې بشر د نېکمرغۍ لوړو مقامونو ته رسوي او نه تطبیق يې ټولنې او وګړي په کږلېچونو ښکېلوي او ناورینونو کې يې ځپي، نو باید له دې کتاب نه د غفلت او بې پروایۍ پر بدو عواقبو او نا وړو پایلو ځان او خلک خبر او وژغورو، پر لارښوونو يې عملاً نړۍ ته عادلانه، عالمانه، رحیمانه، د خواخوږۍ پر بنسټ پر ځان بسيا ټولنه لکه رسول اللهﷺ چې وړاندې کړې وه، موږ هم د قرآن کريم هر اړخيز تطبيق له لارې بشري نړۍ ته همداسې عادلانه او عالمانه ټولنه وړاندې کړو.

الله تعالی وايي: «وَ هٰذَا كِتٰبٌ اَنْزَلْنٰهُ مُبٰرَكٌ مُّصَدِّقُ الَّذِیْ بَیْنَ یَدَیْهِ وَ لِتُنْذِرَ اُمَّ الْقُرٰى وَ مَنْ حَوْلَهَا والَّذِیْنَ یُؤْمِنُوْنَ بِالْاٰخِرَةِ یُؤْمِنُوْنَ بِهٖ وَ هُمْ عَلٰى صَلَاتِهِمْ یُحَافِظُوْنَ».[1]

(دا يو کامل كتاب دى چې نازل كړى مو دى، له خير او بركته ډك دى، هغه کتابونه تصدیقوي، چې مخکې ترې راغلي وو، ځکه چې ته په دې سره د كليو دا مركز (مكه) او د دې شاوخوا اوسېدونكي له دنيوي او اخروي سزاګانو وېروي. څوک چې آخرت مني، هغوی پر دې كتاب ايمان لري او دوی پر خپلو لمونځونو ټينګ دي).

دا کتاب کامل او د ښېګڼو او برکتونو سرچينه ده. نیمګړې لارښوونې او کمزورې خبرې نه لري، ټولې خبرې یې له کمال او ښکلا ډکې او د رحيمانه لارښوونو بېلګې دي. د دې کتاب د عاملانو نېمګړتیاوې، تېروتنې او کمزورۍ تر نورو بې عمله ولسونو کمې دي. هر انسان او قوم هومره د خیر او برکت سرچينه وي څومره چې د دې کتاب پر اوامرو او نواهیو پوه او عملي کوونکى وي.

---

[1]. الانعام: ۹۲.