دویم فصل:‌ قرآن او پخواني کتابونه (۶)

 

 

۶.  قرآن او پخواني کتابونه

پخواني کتابونه د پېغمبر او اسلام پر حقانیت ګواهان دي، دا کتابونه زرګونه کاله وړاندې استول شوي دي، نن هم د قرآن رښتینولي پکې لوستلای او کتلای شو.

الله تعالی فرمايي: «وانه لفي زبر الاولين».[1] (په پخوانیو کتابو کې يې رښتینولي لیکل شوې. )

«وَالَّذِینَ اٰتَيْنَاهُمُ الْكِتَابَ يَعْلَمُونَ اَنَّهُ مُنَزَّلٌ مِنْ رَبِّكَ بِالْحَقِّ فَلَا تَكُونَنَّ مِنَ الْمُمْتَرِينَ (١١٤)».[2]

(كومو خلكو ته چې موږ (له تا مخكې) كتاب وركړى و، هغوى پوهېږي چې دا كتاب ستا د هماغه رب له لوري په حقه نازل شوی دى، نو ته پرې مه شکمنېږه).

قرآن کریم میدان ته را وتی کتاب دی، په ډاګه شکمنو خلکو ته د کره نقد سرچینې هم ښيي او ورته وايي هغه کتابونه چې تردې په زرګونو کلونو مخکې نازل شوي دي په هغو کې د قرآن د رښتینولۍ اسناد ولولئ او د دې کتابونو د پخوانیو لوستونکیو شاهدان وپوښتئ.

« فَإِن كُنتَ فِي شَكٍّ مِّمَّآ أَنزَلْنَآ إِلَيْكَ فَاسْأَلِ الذين يَقْرَءُونَ الكتاب مِن قَبْلِكَ».[3]

( كه د دې کتاب په اړه چې موږ در نازل کړی شکمن یې ؛ هغوی وپوښته چې تر تا مخکې یې کتاب لوستل).

نوی مسلمان شوی عیسوي ابراهيم خلیل احمد پورته پوښتنې ته داسې ځواب وايي: ( تورات انسان ته سالمه لارښوونه کوله او چارې يې ورسمولې، تر دې چې مسیح [علیه السلام] راغی مسیحیانو د انجیل لارښوونې خپلې کړې، بیا قرآن کریم د دواړو ځای ونیو، چې دا تر دواړو کتابونو زیات مفصل او بشپړ کتاب دی، هغه لاسوهنې چې په دې دواړو کتابونو کې شوې وې، هغه یې هم سمې کړي. په قرآن کریم کې هر څه شته، ټول قوانین پکې دي او دا ځکه چې دا وروستى آسماني کتاب دی). ^[4]

دا د هغه عالم وینا ده، چې په مسیحیت کې روزل شوی او نازول شوی و ؛ خو بیا هم د حقپالنې انساني جوهر ورته اجازه نه ورکوي، چې لمر په دوو ګوتو پټ کړي، قرآن کریم تر تېرو ټولو کتابونو خوندور، جامع او هر اړخیز ګڼي او اسلام د پخوانیو پېغمبرانو د پرلپسې هڅو بشپړوونکی ګڼي او دا مني چې له آدم علیه السلام نه تر محمدﷺ پورې ټولو همدې یوه دین لپاره کار کړی دی.

دا خبره دی له ځانه نه کوي ؛ بلکې په تورات او انجیل کې کټ مټ همداسې راغلي دي: (په تورات کې راځي چې الله تعالی په درېو ځایونو کې ځان ځلوي: سینا (د طور غره لمنه)، ساعیر (د فلسطین غرونه)، مکه (فاران غرونه) په تورات کې دا هم راغلی چې فاران د مکې پخوانی نوم دی). ^[5]

ځينې اسلام څېړونکي بیا وايي چې دا درې واړه ځایونه په قرآن کریم کې یاد شوي دي.

الله تعالى وايي: «وَالتِّينِ وَالزَّيْتُونِ(1)وَطُورِ سِينِينَ(2)وَهَذَا الْبَلَدِ الْأَمِينِ (۳)».[6]

التين والزيتون: مراد ترې فلسطین دی، چې انځر او زیتون پکې ډېر کېږي، د فلسطین سپېڅلې خاوره ده، چې پر عیسی علیه السلام د انجیل اسماني کتاب پکې نازل شوی دی.

طور سينين: د سيناء غر چې پر موسی علیه السلام تورات پکې نازل شو.

هذا البلد الأمين: مكه چې قرآن کریم پکې نازل شو.

په تورات کې د قرآن کریم د حقانیت په اړه راغلي دي:(یو پېغمبر به هغه مکې ته راځي، چې قیدار د اسمعیل زوى پکې اوسېدلی دی، په هر کور کې به یې هر څوک پېژني، پر اوښ به سپریږي، په توره به جنګیږي، دی او ملګري به یې برلاسي کېږي، هره ورځ به پرې برکت رالېږل کېږي، [ مسلمانان په تشهد کې اللهم بارک وايي] د یمن پاچایان به ورته ډالۍ ورلېږي، د پېغمبرۍ نښه به يې په ولیو کې د کوترې د هګۍ هومره يو خاپ وي. [(مهر نبوت) دا ټولې نښې یواځې په رسول اللهﷺکې ښکاري] ).^[7]

د انجيل اعتراف

په برنابا انجیل کې

دلته يې متن کټ مټ را نقلوو، چې په څومره ښکاره جملو د رسول الله پر رسالت او د قرآن پر حقانیت اعتراف کوي. «شاګردانو پوښتنه وکړه، استاده! دا نارینه څوک دی، چې ته يې یادوې چې دا به نړۍ ته راځي؟ هغه د زړه په مينه وویل:"دا به محمد رسول الله وي، دا به په بشريت کې رحم، ښېګڼې، مينه او خواخوږي خپروي، لکه باران چې ډېره موده وروسته مېوه ورکوي، دی به هم همداسې وي، دا به د ورنده وريځې په څېر د الله تعالی له رحمتونو مالامال (ډک) وي، دی به د باران په څېر عام رحمت وي چې د باران په څېر پر ټولو اوري». [8]

په یوحنا انجیل کې

«عيسى (عليه السلام) وويل:"کارونه پر ما ډېر زیات دي، ټولې خبرې درسره نه کوم ؛ خو کله چې رښتینې روح راشي، تاسې ته به ټول حقایق ښکاره کړي، هغه له ځانه څه نه وايي، څه چې اوري هغه وايي او تاسې له راتلونکو چارو څخه خبروي».[9]

«کله چې آدم علیه السلام ځیر شو، و یې کاته چې د جنت پر دروازه (لا إله إلا الله محمد رسول الله) لیکل شوي دي ویې ژړل».[10]

انجیل چې پر عیسی علیه السلام نازل شوی او موږ مسلمانان یې پر ایمان راوړو ژمن یو، اوسمهال په نړۍ کې تر یو ملیارد زیات پلویان لري.

ابراهیم خلیل احمد چې نوی مسلمان شوی وایي: « دا پېغمبر به همېشنۍ معجزه وي په دې اړه مسیح علیه السلام وايي: « داسې پېغمبر به راځي، چې تاسو به له راتلونکو حالاتو خبروي، همدا قرآن کریم دی، چې د نړۍ تر بقا یې اعجاز باقي وي، قرآن کریم په طب، ستور پوهنه، زمکپوهنه، جیولوژي، قانون، ټولنه او تاریخ کې تر اوسنیو څېړنو ډېر مخکې دی، اوسمهال علم همدومره څه وينې چې قرآن کریم پخوا ښکاره کړي او پوره یې را معرفي کړي وو ». ^[11]

د هندي مذهبي کتابونو اعتراف

 (السامافيدا) چې د برهمي مذهب کتاب دی د دوهم ټوک په شپږمه او اتمه فقره کې وايي: «احمد له حکمت نه ډک شریعت له خپل رب نه واخست». [12]

په (ادروافيدم) کې چې هندوان یې مقدس کتاب ګڼي وايي:«ای خلکو! واورئ او پوه شئ چې ټولو خلکو ته یو پېغمبر رالېږل کېږي، ستر والی یې په جنت کې هم ستایل کېږي دا به محمد وي». [13]

 (بهوش برانم) چې هندوان یې مقدس کتاب ګڼي د لومړي ټوک په درېيم فصل او درېيم عبارت کې وايي:«دا مهال به الله تعالی یو پردی د محمد په نامه له خپلو ملګرو سره را ولېږي چې لقب به یې استادالعالم وي او ملایکه به يې په پنځو پاکوونکو^[14] سره پاکوي».[15]

د زردشت اعتراف

د زردشت په کتاب کې د قرآن کریم پر حقانیت اعتراف: زندا (اوستا) چې د مجوسو مذهبي مقدس کتاب دی، عبارت يې داسې دى: «الله تعالی به یو پېغمبر را استوي چې صفات به یې دا وي: رحمة للعلمين به وي او مقابلې ته به يې د ابولهب په نامه یو کس درېږي او خلک به یواځې الله تعالی ته رابلي». ^[16]

ګورو چې رسول اللهﷺ نړېوال ټولمنلی پېغمبر او قرآن کریم نړېوال ټولمنلى کتاب دی، د زمکې پر مخ بل داسې کتاب نشته، چې د نړېوالو ادیانو په کتابونو کې د ملاتړ دومره کره شواهد، منلي او علمي اسناد ولري.

د نړېوالو ادیانو مخکښان دې د لمر غوندې پر روښانه حق چې قرآن کریم دى اعتراف وکړي او د بشري انحراف پړه او ګناه دې نوره پر غاړه نه وړي. له حقتلفو، کبرجنو، ظالمانو او پر کږلارو له مېینو پرته د قرآن کریم تطبیق د ټولو کایناتو په عمومي توګه او د ټول بشريت خیر او ښېګڼه په کره او پوره بڼه په هر زمان او مکان کې تضمینوي.

هغه کلونه نږدې دي چې نړېوال څېړنیز ارګانونه د علمي څېړنو له لارې په یوه خوله دې پایلې ته ورسېږي، چې د بشريت د نجات لپاره د قرآن کریم له پوره او کره تطبیقه پرته بله لار نشته.

---

[1]. الشعراء: ۱۹۶.

 [2]. الانعام: ۱۱۴.

[3]. يونس: 94.

[4]. خليل ، د. عماد الدين ، قالوا عن القرآن الكريم موقع شبكة مشكاة الإسلامية ، ص3.

«كانت التوراة في يوم ما هي مرشد الإنسان وأساس سلوكه. حتى إذا ظهر المسيح [عليه السلام] اتبع المسيحيون تعاليم الإنجيل ، ثم حلَّ القرآن مكانهما ، فقد كان القرآن أكثر شمولاً وتفصيلاً من الكتابين السابقين ، كما صحح القرآن ما قد أدخل على هذين الكتابين من تغيير وتبديل. حوى القرآن كل شيء ، وحوى جميع القوانين ، إذ إنه خاتم الكتب السماوية».

[5]. ابراهيم خليل أحمد ، محمد في التوراة والإنجيل والقرآن ، ص 65 ستر عیسوي عالم دی ، مسلمان شو.

[6]. التین: ۱-۳.

[7]. ابراهيم خليل احمد ، محمد في التوراة والإنجيل والقرآن ص 65.

[8]. إنجيل برنابا ص 203.

[9]. ابراهيم خليل احمد ، محمد في التوراة والإنجيل والقرآن ص 72.

[10]. ابراهيم خليل احمد ، محمد في التوراة والإنجيل والقرآن ص 52.

[11]. ابراهيم خليل احمد ، محمد في التوراة والإنجيل والقرآن ، ص 75.

[12]. ابراهيم خليل احمد ، محمد في التوراة والإنجيل والقرآن ، ص 75.

[13]. ابراهيم خليل احمد ، محمد في التوراة والإنجيل والقرآن ، ص 75.

[14]. پنځه وخته لمونځ.

[15]. ابراهيم خليل احمد ، محمد في التوراة والإنجيل والقرآن ، ص 75.

[16]. ابراهيم خليل احمد ، محمد في التوراة والإنجيل والقرآن ، ص 75.