د قرآن کریم ذاکر شاګرد معاذ رضى الله عنه

 لیکوال:محمدناصر حلیمي

د قرآن کریم ذاکر شاګرد معاذ رضى الله عنه

په غیاب کې د خپل ورور مدافع دی، خپله غیبت نه کوي ؛ خو غیبتګر ته ځواب ورکوي:

له مسلمانانو سره د اسلامي امت د شرمېدلیو اختلافاتو او تعصباتو د مشروعیت لپاره په زرګونو پلمې او بهانې شته، چې یو مسلمان د بل مسلمان غیبت او بهتان ځان ته روا ګڼي. عام خلک د عامو خلکو غیبتونه کوي او زړه سړوي. علماء د علماوو غیبتونه کوي او خپلې نیمګړتیاوې پرې پټوي او له همدې لارې نه ځانونه ستایي، خو معاذ بن جبل د مسلمان دفاع کوي.

کله چې رسول الله ﷺ د تبوک په غزا کې د کعب بن مالک رضي الله عنه په اړه پوښتنه وکړه، چې دی ولې رانغی او شاته پاتې شو، لاندې روایت په پوره دقت ولولئ چې د خپل مسلمان ورور په هکله خپل نظر څه ډول څرګندوي:

«مَا فَعَلَ كَعْبٌ؟ فَقَالَ رَجُلٌ مِنْ بَنِي سَلِمَةَ: «يَا رَسُولَ اللَّهِ، حَبَسَهُ بُرْدَاهُ، وَنَظَرُهُ فِي عِطْفِهِ، فَقَالَ مُعَاذُ بْنُ جَبَلٍ: بِئْسَ مَا قُلْتَ، وَاللَّهِ يَا رسول الله مَا عَلِمْنَا عَلَيْهِ إِلَّا خَيْرًا، فَسَكَتَ رَسُولُ اللَّهِ".[1]

(کعب ولې رانغی؟ له بنو سلمه ټبر څخه يو سړي وويل: ای د الله تعالی پېغمبره خپلو دوو څادرونو ناز او نعمت ستون کړی دی، نو معاذ بن جبل وويل: بده خبره دې وکړه، رسول الله ته يې وويل: ای د الله تعالی پېغمبره، پر الله تعالی قسم چې له هغه نه مو بې له ښو بل څه نه دي ليدلي، د الله تعالی پېغمبر صلي الله عليه وسلم چوپ شو).

---

[1]. بخاري ، جعفي ، محمد بن اسمعيل، صحيح البخاري ، ج ۲ ، ص کتاب المفازي ، بَابُ حَدِيثِ كَعْبِ بْنِ مَالِكٍ ، وَقَوْلُ الله تعالی عَزَّ وَجَلَّ: «وَعَلَى الثَّلاَثَةِ الَّذِينَ خُلِّفُوا ، التوبة: 118».