لیکوال:محمدناصرحلیمي

د قرآن کریم تطبیق

د قرآن کریم تطبیق نړېواله ژمنه او اداري فعالیت غواړي، قرآن د ژوند ژور، کامل، هر اړخیز او سم تفسیر دی.

د قرآن هر اړخیز تطبیق د بشري نېکمرغيو ضمانت کوي، خو پر لفظي قرآن بسنه کول له ذهني ستړیا، د تنکیو ماشومانو له عاطفي ځپنې او د تاوتریخوالي له دودولو پرته بله پایله نه لري.

قرآن په یوه عادلانه، کریمانه، رحیمانه او عالمانه چاپېریال کې له ماشومتوبه ترجمه، پلي کول، د زړه تل ته د آیتونو رسول داسې نسلونه روزلای او پاللای شي، چې انساني نړۍ له دې خطرناکو بحرانونو څخه وژغوري او که تدریسي چاپېریال له پورته عناصرو څخه خالي وي، قرآن کریم لوستونکی هم له خیر او برکت څخه تش وي.

په بد چاپېریال او له بد ښوونکي څخه زده کړه هغه بدې پایلې لري، چې په لاندې حدیث کې ویل شوي دي:

«عَنْ عَلِيِّ بْنِ أَبِي طَالِبٍ، رضي الله عَنْهُ قَالَ: قَالَ رسول الله ﷺ: يُوشِكُ أَنْ يَأْتِيَ عَلَى النَّاسِ زَمَانٌ لَا يَبْقَى مِنَ الْإِسْلَامِ إِلَّا اسْمُهُ، وَلَا يَبْقَى مِنَ الْقرآن إِلَّا رَسْمُهُ، مَسَاجِدُهُمْ عَامِرَةٌ وَهِيَ خَرَابٌ مِنَ الْهُدَى، عُلَمَاؤُهُمْ شَرُّ مَنْ تَحْتَ أَدِيمِ السَّمَاءِ مَنْ عِنْدَهُمْ تَخْرُجُ الْفِتْنَةُ وَفِيهِمْ تَعُودُ». ^[1]

(له علي بن ابی طالب رضى الله نه روایت دی، چې رسول اللهﷺ وویل: زما پر امت داسې وخت راځي چې د اسلام به يواځې نوم پاتې کېږي او د قرآن کریم الفاظ پاتې کېږي، مسجدونه په ظاهري توګه ودان او په باطني توګه له هدایت نه بې برخې، پوهان به تر ټولو زمکمېشتو بتر وي، دوی به د جنجالونو سرچينه او په جنجالونو کې ښکېل وي).

---

[1]. ابوبکر ، أحمد بن الحسين بن علي بن موسى الخُسْرَوْجِردي الخراساني ، أبو بكر شعب الإيمان ،  ، ج 3 ، ص 318.