روحي روغتيا

 لیکوال:محمدناصر حلیمي

روحي روغتيا

قرآن کریم روحي روغتیا رامنځته کوي، هغه رحم، زړورتیا، ډار، ترهه، خواخوږي او مینه چې د بشري او الهي حقونو د اداېینې ذریعه او د جسم، روان، عقل او ټولنې د پياوړتيا وسیله شي روحي روغتیا ګڼل کېږي، چې دا ټول په قرآن کریم کې شته دي. د انسانانو د مړينې لوى لامل خپګان او وېره ده. الله تعالی انسان ډاډمنوي چې خفه نشي او نه ووېرېږي او ورخطا نشې.

قرآن وايي: «إنَّ مَعَ الْعُسْرِ يُسْرًا».^[1]

ښځو کې خپګان او وېره ډېره راځي، نو ورته وايي: «وَلَا تَخَافِي وَلَا تَحْزَنِي».^[2]

په زغم سره د ژوندانه د ستونزو ګالل، په تدبیر سره د ستونزو هوارول، د ژوندانه لوړو ژورو ته نه غمجنېدل، په پرمختګونو نه مغرورېدل او په ناکامیو نه نهیلېدل، ناکامي د بري پیلامه ګڼل، لنډه دا چې ژوند د متوازنو سیستمونو له لارې په ګټوره بڼه پر مخ بيول رواني روغتیا او قرآني غوښتنه ده.

پوهان په څېړنې دې نتیجې ته رسېدلي چې د ژور خپګان (ډیپریشن) درملنه په عباداتو، رکوع، اذکارو، تلاوتونو او د انسان په ډاډمنولو کې د زياتو سجدو اغېز زيات دی. همداسې د روژې، زکات او نورو عباداتو په اړه ډېرې ښې مسلکي ليکنې او ويناوې لري.

که موږ طب او روغتیا ته پوره کار کړی وای، اوس باید د ټولو اسلامي احکامو روغتیايي او طبي ګټې د نړۍ په ټولو څېړنیزو ارګانونو کې د یوه منلي سند په توګه موجودې وای. دا د اسلام حق و، چې د هر حکم روغتيايي ګټې دومره څېړل شوى واى، چې د اسلامي احکامو اعتبار ١٠٠% له نړۍ سره واى. متاسفانه د اړتيا په تناسب هېڅ مو نه دي کړي.

---

[1]. الا نشراح:5-6.

[2]. القصص: ۷.