عدلپالنه او زړورتیا

 لیکوال:محمدناصرحلیمي

   

۲۵.  عدلپالنه او زړورتیا

د دې کتاب حامل باید پر ظلم، مظلومیت روږدی، ظالم ته يې سر ټيټ او پر مظلوم لاسبری نه وي، د قرآن کریم د تدريس په چاپيريال کې بايد وهل، ټکول او رټل نه وي چې د انتقام اخستو، شخصیت زبېښونکی او سړیتوب وژونکی احساس پکې پياوړى کېږي.

د نړۍ ظالمان په ظالمانه جریاناتو کې له قرآنپوهانو نه د استفادې پر میتودونو، د ظلم د ترویج په ګټه د دوی په استخدام کې ډېرې منظمې طرحې او منتج سیستمونه لري.

تاریخ ګواه دی چې د تاریخ په اوږدو کې د ظالمانو د ناکردو تر شا د ظلمپاله قرآنپوهانو د اجيرانه فتواو لاس ؤ. د قرآن کریم اساسي پېغام د عدل ځواکمنول او د ظلم له منځه وړل دي، هغه چې په ظلم روږدی شوی او ظلم پرې شوی وي او بښنه ترې نه وي غوښتل شوې، څوک پرې قصاص شوی نه دی، د عدل توقع به څه ترې وشي، په کومه خوله ترې وغواړو چې په ټولنه کې د ظالم او ظالمانه عمل ترشا مه درېږه؟.

د قرآن کریم د شاګرد لپاره باید داسې چاپیریال رامنځته کړو چې داسې کریمانه او عادلانه چارې ترسره کړي چې خلک د عامې او هر اړخیزې لورنې تر چتر لاندې د سپېڅلو او هسکو اهدافو د لاسته راوړلو په موخه کېنوي.

دا هیله د قرآن کریم له حافظ او زده کوونکي څخه هله کېدای شي، چې د قرآن کریم تعلیمي چاپېریال ظالمانه نه وي او له ماشومانو سره چلن او تعامل د وهلو، دګلو، رټلو او ځپلو له مخې نه؛ بلکې د لورنې، پوهاوي او روزنې له مخې وي.

متأسفانه د تعلیم او تحصیل په ښوونیزو ډګرونو کې له معصومو ماشومانو او با احساسه ځوانانو سره د ګواښنده او شرمښ چلنه صحنو شاهدان یو. شرمښانه وهل، بې رحمانه ځپل او رټل د ماشوم مورال ځپي او شخصیت یې وژني، د ټولنې په پرمختګ کې يې نقش له منځه وړي.

د قرآن کریم له هغه حافظ نه چې په ظالم درسي چاپېریال کې روزل شوی وي بې له ظلمه بله هيله نشي کېداى؛ مګر چې ور انتقال شوی ظالمانه احساس او د رواني رنځ درملنه يې په یو بل مهربانه درملوونکي عاقلانه محیط کې ترسره شي.

قرآن سر ترپایه د رحمت کتاب دی، حق يې په مهربانه چاپيريال، لورانده ښوونکو عالمانه او عادلانه تعلیمي سیستمونو سره رامنځته کېږي. ظالمان او ظلم ته سر ټیټوونکي خلک ولسونو ته د رحمت پیغام په عملي بڼه نشي رسولای.

زه چې ځینو ته ګورم چې د ظالمانو ظالمانه کړنې په عدالت توجیه کوي، ملاتړ یې کوي، تر شا یې دریږي؛ نو پوهېږم چې دی له ماشومتوبه د ذلت په کمچينو روزل شوی او ستر شوی دی، باور وکړئ چې د ملت د وینو څښونکي هم په پوهانو کې مداحان او د دروازې ملنګان لري.

که موږ د قرآن کریم لوستو لپاره عادلانه، کریمانه او عالمانه محیط برابر کړ، نو قرآن لوستي وګړي بیا د ظالمانه سیستمونو په جعل، تزوير، د ظالمو ښکاريانو په ناولیو مښوکو او چټلو پنجو کې ځان ته خوراک، څښاک او پوښاک نه لټوي، بيا بشـري سعادت ته د اسلامي امت وحدت، د دین او ایمان په نامه له منځه نه ځي، مسلمان د مسلمان پر ضد نه روزل کېږي. په منافقت داسې نه روږدېږي، چې مسلمان په مسلمان او اسلام په اسلام د خپلمنځي اختلافاتو له لارې وځپي.

ما چې د اسلامي امت علمي اختلاف ولوست رحمت و؛ خو د تعصب پر بنسټ د د اختلافي موضوعاتو له لارې د خلکو د پارولو ترشا مې د ناولیو، مستبدو چارواکو غځېدلي لاسونه ولیدل.