پایله

 لیکوال : محمدناصر حلیمي 

موضوع: د قرآن کریم نومونه صفتونه ، ښوونیز روزنیز نقش او اثار د کتاب پایله

پايله

قرآن او محمد صلی الله علیه وسلم د نړۍ په عاقلانو کې مخالف نه لري.

قرآن د نړۍ د عاقلانو اندېښنو او پوښتنو ته د ځوابونو جامع، هر اړخیزه او پوهنیزه مرجع، څپانده، خوږه او هضمېدونې چینه ده. څومره چې د انسان عقل پیاوړی او عاطفه سپېڅلې وي، هومره د قرآن کریم د لوستو او پوهېدو وږی او تږی وي.

د قرآن کریم مخې ته سترخنډ د قرآن کریم پلویانو جوړ کړی دی او هغه دا چې پلویان يې زياتره په قرآن کریم نه پوهېږي. لږه برخه چې پوهېږي په هغوی کې ډېرې برخې د قرآن کریم په لفظي زده کړه بسنه کړې.

 ډېره لږه برخه يې په ژباړه پوهیږي. د قرآن کریم د تطبیق لپاره هڅه او اراده نه لري. تشکیل، کاري، کادري، منظم او منسجم نړېوال ټیم خو ډېره لوړه خبره ده، ځکه چې د قرآن کریم د پلي کولو وړتیا يې له لاسه ورکړې ده.

ښځینو ته د قرآن کریم د زده کړې په اړه د مسلمان بې پروايي له څو پېړیو راهيسې نابښونى جرم دی.

راتلونکي نسلونه ۹۰٪روزنه له میندو اخلي او د مسلمانو ښځینو ذهنونه د قرآن کریم له لارښوونو سره نا بلده دي، دوی هېڅکله انساني ټولنو ته قرآني شخصیتونه په کامله بڼه نشي وړاندې کولای. همدا لامل دی چې موږ د بشري ټولنې د قرآني شخصیتونو له کمښت او نشت سره مخ یو.

قرآن لومړی حنة، د مریم د مور، بیا د مریم بیا د عیسی علیهم السلام انساني لوړې ځانګړنې یادوي.

قرآن لومړی د موسی علیه السلام د مور بیا د موسی علیهم السلام لوړې انساني ښېګڼې بیانوي.

 د پېغمبرانو اساسي دنده په بشري پرګنو کې د الله تعالی د آیتونو د تطبیق وړتیا روزنه او د شتو کمیو او نیمګړتیاوو جبرانونه وه، لکه چې په دې آیت کې الله تعالی وايي: «كَمَا أَرْسَلْنَا فِيكُمْ رَسُولًا مِنْكُمْ يَتْلُو عَلَيْكُمْ اٰيَاتِنَا وَيُزَكِّيكُمْ وَيُعَلِّمُكُمُ الْكِتَابَ وَالْحِكْمَةَ وَيُعَلِّمُكُمْ مَا لَمْ تَكُونُوا تَعْلَمُونَ).[1]

(همداسې چې موږ ستاسو له جنسه تاسو ته پېغمبر در لېږلی چې تاسو ته زموږ آیتونه ولولي، په تاسې کې درانه خویونه پیاوړي کړي، د کتاب او سنت تعلیم درکړي، هغه څه در وښیي چې پري نه پوهېدئ).

---

[1]. البقرة: 151.