د روغتیا پالنې او پوهنې په موخه

 لیکوال:محمدناصر حلیمي

د روغتیا پالنې او پوهنې په موخه

قرآنپوهنه بايد د روغتیا پالنې او درمل پوهنې په موخه وي، زموږ د مسلمانانو دنده قرآنپوهنه د روغتیا لپاره او روغتیا پوهنه د قرآنپوهنې د عامونې لپاره ده. قرآنپوهان او مفسرين باید زموږ اجتماعي، فردي، رواني، عقلي، روحي، سیاسي، رنځونه په ګوته او تداوي کړي او په دې لړ کې علمي معیارونه او د روغتیا لپاره کره فارمولونه وړاندې کړي.

د مفسر لومړنى شرط باید دا وي چې ټول عقلي، رواني، روحي، اجتماعي رنځونه وپېژني چې قرآن کریم د شفا بښنې تفسیر سره نړۍ کې د رنځونو د کچې په کمولو کې نقش او د پېغمبر د وراثت ادعا رښتنې کړای شي. د مفسر په شرائطو کې دا داخل شي چې لږ تر لږه د پنځه زره جسمي، عقلي او روحي رنځونو نومونه، تعريفونه او خطرونه يې زده وي البته د عمومي معلوماتو تربريده.

ځکه عمر رضي الله عنه وايي: «څوک چې جاهليت نه پېژني اسلام نه پېژني».[1]

بل ځای داسې وايي: «هغه چې په اسلام کې روزل شوی او جاهلیت نه پېژني، د اسلام رسۍ لوېشت لوېشت شلوي».[2]

څوک چې رنځپوه او رنځور پوه نه وي، اسلام ځکه نه پېژني چې اسلام د رنځونو درملنه، له رنځونو ژغورنه او له درملنې وروسته رغونه ده او دغه چارې بې رنځپوهنې او رنځور پوهنې نه کېږي.

---

[1]. عربي متن یې: « لا يعرف الإسلام من لم يعرف الجاهلية».

[2]. عربي متن یې: « إنَّمَا تُنْقَضُ عُرَى الْإِسْلَامِ عُرْوَةً عُرْوَةً إذَا نَشَأَ فِي الْإِسْلَامِ مَنْ لَمْ يَعْرِفْ الْجَاهِلِيَّةَ».