پر ناروغانو ظلم

 لیکوال:محمدناصرحلیمي

پر ناروغانو ظلم

د طبي تخصص په اړه بې پروايي، د ډاکترانو لرېوالی له طبي اخلاقو څخه، ناروغ ته اټکلي دوا ورکول لوی ظلم دی، بدل درمل پلورل نابښونی جنایت دی. درمل باید په دقیق تشخیص او کره علم له تجارتي موخو پرته تجویز شي:«عن أبي الزبير عن جابر عن رسول الله صَلَّى اللَّهُ عَلَيْهِ وَسَلَّم قال إن لكل داء دواء فإذا أصيب دواء الداء برأ بإذن الله ». [1](له ابن زبیر رضي الله عنه نه روایت دی چې رسول الله ﷺ وویل: هر رنځ درملنه لري، کله چې درمل له رنځ سره برابر شو، ناروغ د الله په امر رغیږي). نو دا کار د فطري وړتیا، تخصص او ژمنتیا پر اساس شونی دی. له درملنې څخه د خلکو بې پروا کول پر ناروغ ظلم دی.«عن بن عباس قال قال رسول الله صَلَّى اللَّهُ عَلَيْهِ وَسَلَّم أيها الناس تداووا فإن الله عز وجل لم يخلق داء إلا وقد خلق له شفاء إلا السام والسام الموت».[2]

(د ابن عباس رضي الله عنهما روایت دی چې رسول الله ﷺ وویل: ای خلکو درملنه وکړئ! له سام (مرګ)پرته يې داسې رنځ نه دی پیدا کړی چې درمل يې نه وي).

پوندګرۍ او کروندګرۍ ته په حکومت کې دومره وده ورکول چې هر انسان ته له استثنا پرته شېدې ورسېږي او د زمکې هره لوېشت باید ښېرازه او ودانه شي، پر دولت د انسانانو یو روغتیايي حق دی. دولت بايد د شيدو زياتو توليداتولپاره په ميليونونو غواګانو روزنې ته زمينه سازي وکړي.

«عن عبد الله بن مسعود قال قال رسول الله صَلَّى اللَّهُ عَلَيْهِ وَسَلَّم تداووا بألبان البقر فإني أرجو أن يجعل الله فيها شفاء فإنها تأكل من الشجر».[3]

(د عبدالله بن مسعود رضي الله عنه روایت دی چې رسول الله ﷺ وویل: د غوا پر شېدو درملنه وکړئ! باور لرم چې الله تعالی پکې شفا ایښې ده ؛ ځکه چې د ونو پاڼې خوري).

دا حدیث پر موږ لازموي چې د غواګانو په زرګونو ستر فارمونه ولرو او خپل ولس د شیدو له لارې تقویه او تداوي کړو، د شیدو د پرېمانۍ له لارې د بدن معافیوي سیستم يې دومره پیاوړي کړو چې د سترو رنځونو مقابله وکړي داسې نه چې کمزوري بدن سره معمولي رنځونو ته څملي!

جراحي عملیات، د رنځور خواړه او اجر

د جراحي عملیاتو جریان د لاندې نبوي حدیث تطبیقي برخه ده، په دې ډګر کې پرمختګ کول د عمل په ډګر کې د نبوي حدیث ځلول دي، لاندې روایت ته په دقت وګورئ!

«عن أسماء بنت أبي بكر الصديق رضي الله عنهما قالت خرج في عنقي خراج فذكر ذلك للنبي صَلَّى اللَّهُ عَلَيْهِ وَسَلَّم فقال افتحيه فلا تدعيه يأكل اللحم ويمص الدم».[4]

(د اسماء بنت ابي بکر رضي الله عنهما روایت دی چې پر ورمېږ مې دانه راوخته، رسول الله ﷺ وویل: ايله يې کړه، مه يې پرېږده چې غوښه دې وخوري او وینه دې وروي).

«عن عقبة بن عامر قال قال رسول الله صَلَّى اللَّهُ عَلَيْهِ وَسَلَّم لا تكرهوا مرضاكم على الطعام فإن الله يطعمهم ويسقيهم».[5]

(د عقبه بن عامر رضي الله عنه نه روایت دی چې رسول الله صَلَّى اللَّهُ عَلَيْهِ وَسَلَّم وویل: خپل رنځوران په خوړلو مه اړ کوئ! الله تعالی يې پرې خوري او څښي).

رنځور ته د اخروي ثوابونو ډاډ ورکول یو روغتیايي حق دی.

«عن أبي أمامة الباهلي عن نبي الله صَلَّى اللَّهُ عَلَيْهِ وَسَلَّم قال ما من عبد يصرع صرعة من مرض إلا بعثه الله منها طاهرا». [6]

(ابي امامة الباهلي رضي الله عنه روایت دی چې رسول الله صَلَّى اللَّهُ عَلَيْهِ وَسَلَّم وویل: هر رنځور چې له رنځ کړیږي، الله تعالی يې ګناهونه وینځي او پاکوي).

«عن أنس بن مالك قال أتى رسول الله صَلَّى اللَّهُ عَلَيْهِ وَسَلَّم شجرة فهزها حتى تساقط من ورقها ما شاء الله أن يتساقط ثم قال الأوجاع والمصيبات أسرع في ذنوب بن آدم مني في هذه الشجرة».[7]

(د انس بن مالک رضي الله عنه نه روایت دی چې رسول الله صَلَّى اللَّهُ عَلَيْهِ وَسَلَّم یوه ونه دومره وڅنډله، چې پاڼې يې ورژېدې. بیا يې وویل: لوږه او مصیبتونه ګناهونه تر دې زیات رژوي)

په ناولو شيانو درملنه

«عن مجاهد عن أبي هريرة قال نهى رسول الله صَلَّى اللَّهُ عَلَيْهِ وَسَلَّم عن الدواء الخبيث».[8]

(له مجاهد او ابي هریره رضي الله عنه روایت دی چې رسول الله صَلَّى اللَّهُ عَلَيْهِ وَسَلَّم له نا پاکو درملو منع کړې ده).

---

[1]. ابن حبان ، ابو حاتم البستي محمد بن حبان بن التميمي ، ابن حبان ، ج 13 ، ص 428.

[2]. أبو محمد الكسي عبد بن حميد بن نصر مسند عبد بن حميد ج 1 ، ص 248.

[3]. الطبراني ، الحافظ ابي القاسم سلېمان بن احمد ، المعجم الكبير ج ۱۰ ، ص ۱۴.

[4]. الحاکم النیساپوري ، ابو عبدالله محمد بن عبدالله الحاکم ، المستدرك على الصحيحين ، ج۴ ، ص ۴۵۲.

[5]. الطبراني ، الحافظ ابي القاسم سلېمان بن احمد ، المعجم الكبير ج ۱۷ ، ص ۲۹۳.

[6]. الطبراني ، الحافظ ابي القاسم سلېمان بن احمد ، المعجم الكبير ج ۸ ، ص ۹۷.

[7]. أبو يعلى الموصلي أحمد بن علي بن المثُنى بن يحيى بن عيسى بن هلال التميمي ، مسند أبي يعلى الموصلي ج 7 ، ص 277.

[8]. الشيباني ابو عبد الله أحمد بن محمد بن حنبل بن هلال بن أسد بن حنبل ، مسند أحمد ، ج13 ، ص 416.