د شعور او لا شعور پاکه او هوډمنه ساحه

لیکوال:محمدناصرحلیمي

۲۸      د شعور او لا شعور پاکه او هوډمنه ساحه

د شعور او لا شعور د ساحو د پاکوالي او ویښتیا په تناسب دا کتاب په زړه او عقل کې په منتجه تولیدي بڼه ځای نیسي. اروا پوهان د انسان د دماغ ساحه په دوو ډولونو ویشي، چې مخکنې ۱۲٪ ته یې د شعور او شاتنې ۸۸٪ ته یې د لاشعور ساحه وايي، شعوري ساحه هغه ده چې انسان په ارادي توګه خپل عقلي، جسمي او رواني چارې، کړنې، پرمخ بیايي او د لا شعور ساحه هغه ده چې انسان په غیر ارادي توګه خپلې کړنې ترسروي.

قرآن کریم الله تعالی انسانانو ته واستاوه، که له پورته شرایطو سره قرآني تدریسـي چاپېریال جوړ کړو، د قرآن له لارې د انسان د شعور او لا شعور ساحې داسې روزل کېږي، چې د الله، بشر، حیوان او نبات حقونه په کره او پوره بڼه ترسرولای، له بشـري او طبیعي سرچینو نه عزتمنه، عالمانه او متوازنه ګټه پورته کولای شي.

ځکه چې دا کتاب د رحم، عدل او لارښوونو سرچينه ده او د عالمانو زړونو ته لار مومي. په کومو زړونو کې چې د هوس، ظلم او جهل تورتمونه وي، هغه له قرآني رڼا نه همېشنۍ، عامه او هر اړخیزه ګټه نشي کولای. په لنډه توګه ویلای شو چې قرآن کریم د انسان د شعور او لاشعور سمبالن، ښوونیز او روزنیز کتاب دی.

په پورته ډګر کې د ښوونې، روزنی، او ارواپوهنې، قرآن علومو ګڼ تخصصه شخصيتونه پورته برنامه طرح او تطبيقولای شي.